غريب الاطوار اسم على مسمى

السلام عليكم ورحمة الله وبركاته اليوم اشوف نفسي لي مزاج اكتب منها اطرح ماعندي ومنها أسليكم
أحب أقول ترا كثير مننا يخطي بفهم الامور بالحياه ومهما يكبر الانسان يبقى يتعلم احب اقول للجميع العمر مراحل وكل مرحله لها اجواء ومتطلبات ورغبات يعني عمر ال 15 الى 20 الافكار والمزاج وكل شي اختلف تماما لما وصل مرحلة 25 وينتقد نفسه كيف كان تفكيره وقتها ويدخل بمرحلة جديده ويوصل ال 35 يتغير كل شي كان يحبه ويميل له
المهم وهذي نصيحة مني لكم أجمل مابالحياه شي جميل جدا الوالدين واذا ماتصدقون أسألوا من فقدهم رحمة الله عليهم
بعد رحيلهم تغيرت الحياه كامله كل المراحل الي مرت هي وافكارها تافهه جدا وتكتشف ان فيه شي جميل لكن ماكنا نعرف جماله بالدرجه هذي الا بعد فقدانه
زبدة القول لو مهما يصف لك شي شعور معين ماراح توصل الاحساس الي هو يبيك تفهمه
وعلى سبيل المثال فقدت والديني رحمة الله عليهم وكانت صدمه كبيره بالنسبه لي تغير طعم الاكل تغيرت الالوان بعيني تغير كل شي بحياتي رحمة الله عليهم
اما الشعور الثاني فهو صدمه لكل شخص او شرحته لكن يبقى صدمه
بعد فقدان الوالدين رحمة الله عليهم وجت مرحلة الزواج وجوا الابناء هنا الصدمه الي ماكنا نعرفها شفنا غلا الابناء والبنات فلذات الكبد ما اتتمنى اي شي يمسهم من حبك وخوفك عليهم
هنا الصدمه لانه ماكنت تعرف ان هذا شعور والديك عليك يالله رحمتك وارحمهم وارحم اموات المسلمين

غريب الاطوار لم اختار هذا الاسم عبث واسموني به من عاشرني ودخل بحياتي احب اسولف لكم شوي عن غريب الاطوار
كل شي يتعلق بالماضي الي مر علي ويخصني هذا اجمل شي جميع صديق مر علي وحتى لو عشرة بسيطه ابحث عنه ولازم اقابله اعيد الماضي والذكريات وايام ما كانوا والدينا عايشين رحمة الله عليهم زملاء الدراسه اتواصل معاهم واحزن على من فارقناهم المهم لي ماضي جميل كنت محبوب ولازلت بفضل الله سبحانه
شخص مر بحياتي واول حياتي واول عمري واول مافتح القلب على الحياه شخص كان يكبرني بسنه تعرفنا انا بثاني متوسط والشخص بثالث متوسط ..
على فكرة نسيت اقول شي ظروري عن العلاقات العاطفيه زمان ايوالي خلق الكون لاتقارن نهائي بالوقت هذا يعني حب عذري روحاني يعني جلسة مع من تحب وكلام جميل خالي من مايشوه ويعكر المحبه وكان الحب حب طبعا فيه تلفون ارضي بس بالنسبه للبنات فيه صعوبه شوي وبالنسبه لعلاقتي كانت الرسائل وسيلتنا يعني يوم اسمع اغنية محمد عبده لاتردين الرسايل ويش اسوي بالورق وكل معنى للمحبه ذاب فيها واحترق

غبنا عن بعض سنين وسنين مايقارب 31 سنه ايوالله وكبرنا وعيالنا كبروا لكن جلست ادور هالانسان هذا رغم التكنلوجيا الي حنا فيها عجزت الى ان توصلت لانسان وسالته تعرف الشخص الفلاني قال اعرفه فرحت من قلبي انه عايش بس صار عندي فضول ودي اكلمه لا لشي بس اذكره بماضينا واقوله شف كم سنه 31 او اكثر والله مانسيتك
جاب لي جواله الشخص هذا وصرت بشعور غريب معقوله هذا فلان ولقيته وذكرياتنا وياما سهرنا وبكينا وتلوعنا
المهم جازفت بالرساله كانت مقاله ماهي رساله بديت فيها معقوله انك فلان احمد الله انك حي وطيب انا من خبرك والله ادورك وانا اليوم سعيد حتى لو مارديت علي كلام طويل بدون ما اذكر من الله والله العظيم دام حلفت بالله الكلام هذا قبل 33 سنه
المهم بعد يومين رد علي ويشهد الله نفس ماكان عليه احييت شخص ميت بداخله رجعته لجنًونه بي لكن الظروف لاتسمح لازم اغادر ونغادر بعض برغبتنا لان كل شي مايسمح الان
زبدة الكلام شفته لمحه ليتني ماشفته الكبر ماخذ حقه وحتى الصوت والملامح تاكدت الي مضى لا يعود واستغلوا كل يوم انتوا فيه حتى تصبح الحياه حلوه
احدن بالدنيا سعيد ومرتاح .. واحدن بها دايم تعيس وشكاوي ..
لاتلومني ياشوق في ماضين راح .. ذي دبرة الله وماعلى الرب قاوي
ياما سهرنا لين اصبح الاصباح .. وياما تهقوينا وخابت هقاوي

اتمنى ان كتبت لكم شي يونسك حفظكم الله ورعاكم

حـُـلم ,غَيْم..! ,عشق و 3 آخرون معجبون بهذا

عطر المساء ,* السلطان * ,همس الاحساس