حصريا بقلمي 🌷

حصريا بقلمي 🌷

السلام عليكم ورحمة الله وبركاته
قصتي اليوم غريبه شوي حبيت اكتبها لكم للمتعه وكل كلمة بها هي حقيقه وليست من نسج الخيال
بما اني صرت رجل بالماضي ورجل بالحاضر ماني عارف انسى الماضي ولاني عارف اواكب الحاضر لكن سنة الحياه والحمدلله على كل حال نحمده ولا يحمد سواه نحمده على نعمة التي لاتعد ولاتحصى
اليوم امزح شوي معتدل وقل اكتب لكم قصة من قصص عديده مرت علي بالحياه

لكن اليوم حدث معي شي غريب بالمنتدى ياجماعه شي غريب والله بالفعل
طبعا الاخت العزيزه المحترمة مسك الي عودتنا على احترامها باخلاقها العاليه حسيت انها تملك حاسه واستشعار قوي ماشاءالله وتبارك الله
لفت انتباهي موضوع ورحت ابغى احط ماعندي فيه وخصوصا انه من كلمات قليله وكنت ناوي اكتب كلمه او اسم جيت اكتب لقيت الاخت مسك حاطه الي انا ناوي اكتبه والحقيقه ماهو بس اننا تقاسمنا الاسم الشي الغريب كانت قبلي وماهو اي اسم بعد يعني كانها تقول الاسم هذي يبي يجي بعدي ويكتبه هو نفس صاحب الاسم ههههههه الحقيقه ضحكت وادري انها جت من باب تقدير العزيز الحكيم
المهم مشينا للقصه والقصه هذي خلفت لي جروح لاتندمل من ضمن جروح عديده مرت بها بهالعمر الطويل القصير
قصتي هي معاناه انضافت لمعانات كثيره مشابهه لها وغير مشابهه المهم زادت الحمل علي شوي
القصه تقريباً ما ابغى اقول كم سنه راح اذكر تاريخ وانتم بكيفكم عاد هي في عام 2001 ميلادي تقريبا
وقتها كان عملي يختلف عن عملي الحالي لاني تنقلت من في عدة وزارت مايقارب الخمسه ووقتها كنت اداوم يوميا 180 كيلوا
يوم من الايام راجع بالطريق واتفاجأ بسياره واقفه على طرف الاسفلت وليس على الاكتاف والطريق وقتها سايد واحد شف المنظر وقلت لازم اوقف واطلع السياره عن الطريق فعلا وقت وكان عند السياره رجل كبير بالعمر مايقارب ال 80 وواقف بجنبها سلمت عليه وقلت له ياعم السياره كذا تسبب حادث لاسمح الله قال خربانه قلت عطني المفتاح احط القير بفاضي وادفها عن الطريق لان فيه نزله تساعدني اخذت المفتاح وركبت بسياره واتفاجأ بوجود حرمه بالمرتبه الخلفيه المهم ابعدت السياره عن مكان الخطر ونزلت وقلت للرجال هذا انت من وين جاي وليش مانزلت السياره قبل تتعطل قال معاي سواق هندي راح يجيب سطحه فعلا خلال نص ساعه جاء السواق وطلعلوا السياره على السطحه ومن باب العطف والمساعده والاجر الشاهد الله قلت تعالوا معي لبيتي وخصوصا عرفت السياره لاي كراج تروح
وقتها كانت عندي الوالده الله يرحمها بالبيت وبهذاك اليوم كانت مسافره يعني عزابي قلت ماني قايل لهم لين يجون البيت
خلف بيتي ارض ثانيه لنا ومسوي فيها نجيل وجميع انواع الاشجار ومسميها الركن الهادي كنت مخليها فقط للندماء العزيزين علي جدا وخاصه وحاط بنص الحديقه غرفة مثمنه من زجاج وستاير المهم جلستهم فيها
ورحت اجيب لهم غدا ومشروبات وماء وقتها حنا بالصيف
غيرت ملابس الشغل ولبست ثوبي وقلت لهم والله انا عزابي وخفت ماتجون معاي على شان كذا علمتكم الان تشكر الرجال مني والحرمه ساكته وكانها ماهي مرتاحه
حطيت لهم الغدا ورحت اشوف سيارتهم قالي الكهربائي ماتخلص الا الساعه 10 ليلا تقريبا
والا حنا قبل الغروب بقليل رجعت لهم وعلمتهم ان عطال السياره بسيط وتخلص الساعه عشره وراح يكلمني السواق بس تخلص حتى ادليله البيت
برجعتي لهم الثانيه حسيت ان الحرمه تغيرت وصارت هي الي تسولف وكأنها ارتاحت اكثر من الاول
طبعا بعض الاحداث ماراح اذكرها لانها عديمة الفائده
وقتها انا متعب جدا وجالس عندهم لين خلصت السياره لكن نسيت اقولكم صارت تاخذ جوله بالحديقه وتعلمني بالاشجار الي انا زارعها
بعد ماجت سيارتهم اصرت علي اني الحقهم الى خارج المملكه كان لهم هناك واصروا بالحاح اني اجي وراهم حتى يردون لي بعض ماقدمت وانا والله ماسويت الا لوجه الله
حاولت انهم ينامون عندي الا انهم قرروا يمشون
الحرمه هذي عمرها تقريبا بالاربعين وهذا عمها الي معها لكن ناس محترمين جدا
بعد ماوصلوا اتصلت علي وقالت ليش ماجيت وجلست اتعذر وقلت بس تكون فرصه عندي والله اجي
صرت تلح علي وتقول تعال نوديك امكان برا ماجيتها وانا
بعد شهر تقريبا سافرت لهم وحسيت باستقبال ماهو عادي وكرم وحسن ظيافه المهم اول ليلة عندهم عرفتني بنفسها وطلعت سيدة اعمال فعلا معروفه
حتى البيت الي جيتهم فيه كان متواضع لكن اعجبني الترتيب واعجبني تجهيز مكان مخصص لي وقالوا لي هذي غرفتك كانت غرفة نوم ووقتها الدنيا مطر ويشهد الله ماعمري نملت مثل النومه هذي على طول غفيت لكن قبل النوم كانت تقولي مسويه لك برنامج من بكره يبدا وانا ناوي اغادر بس اصحى من النوم ماعلمتهم لاني حسيت بفرحتهم بي
الصباح جلست من النوم ولقيت مجهزه الفطور وقالت اكيد نمت كويس حتى نوديك اماكن تنبسط فيها
قلت والله اني حصل عندي ضرف واعتذر لازم امشي ولكن اوعدكم بجيه ثانيه
هنا حصل الي ماهو بالحسبان هنا حصل الي مانسيته ولا انساه هذاك اليوم
حسيت ردي كان صدمه موجعه لها لاني ما احب اثقل على احد
طبعا دار حديث طويل قبل امشي خلاني ابكي والله ندمت حتى على جيتي من كثر اصرارها اني اجلس وصارت مصدومه
الكلام كان الساعه 8 صباحا ولا قدرت اطلع من عندهم الا 12 الظهر ماكنت اتوقع هالتمسك بي للدرجه هذي لدرجة والله قالت حتى شغلك اتركه عندي الشركه الفلانيه والشي الفلاني لكن سبحان من جعل الماديات بحياتي ليست لها قيمه يشهد الله ولا التفت لها
اختصرت الحديث الي دار وانصدمت انا من مكانتي عندهم الي فوق ما تتخيلون
قبل افتح باب الشارع دار حديث بسيط جرحني الى اليوم هذا ما انسى هذاك الموقف طلعت لسيارتي والله ابكي
اتصلت علي وانا راجع بطريق سمعت كلام ماغاب عن مسمعي للان ماتمنيت اني اكون بحياة شخص مثل كذا تعبت نفسيا رجعت مكسور وحزين من هالمشوار وتمنيت اني ماجيت
استمرت العلاقه الاخويه بالتلفون الى ان دعني في بيتها الي هنا
تقابلنا بعد ثلاث سنوات بنفس المعزه والغلا واكثر وتكرر معي نفس الموقف عند مغادرتي كل الطرق بيننا مقفله والمبادئ تغلب على كل شي من ناحيتي ومن ناحيتها لان قطار الاشواق كان متعدي
جلسنا على هالحال هذي عشر سنوات كانت بالنسيه انا وبالخص هي سنين عذاب ماتمنيت اكون كذا يشهد الله الا ان انقطعنا فجأه لا اعلم ماهي الضروف الان ولكن هذا هو المقدر وهذا هو النصيب وهذي هي الفوارق مستحيل تتغير فترة العشر سنوات هذي احرقت من عمري وعمري محروق من اول يمكن كنت اجاري اكثر من شخص وهي ماتدري عن ضروفي الله يحفظها وين ماكانت واسال الله لها الرضوان والقبول
وهذي القصه وهي جزء بسيط من قصص مرت علي واستغفر الله واتوب اليه
اتمنى اني شاركت معكم بشي حصري ومنها فضفضت عما يدور داخل الحنايا لعلي اجد مايخفف عني تلك اللحظات والى لقاء في قصة قادمه بحول الله وهذا سبب اقفال القلب ليس لشعار اخر انما اقفال دايم يعني بطلت ادخل مواضيع للقلب الان صرت احول اي موضوع جديد اما للكلى ولا الطحال المهم اعفيت القلب من مامر عليه

زل الطرب يا موجع الطار بالكف 
شابت قوافي الليل نور الضحى لاح 
تلعب وانا ما عاد لي بالطرب شف 
لعبك بروحي بدل الفرح بجراح 
كانك تدق القلب دقك على الدف 
عسى الضلوع توقّي القلب لا طاح 
شفتك ولا ادري من قضب بعدك الصف 
ناسٍ كثير وكنهم عندي أشباح 
نورك دعاني عندك الشوف وقف 
كنه فنار لاح في عين ملاح 
من له ثمان اسنين من راح منكف 
خلى السفين وعارض الموج سباح 
من فرحته ما حسّب الحبل يتلف 
غلب عليه الموج والقاع منزاح

وعذروني على الاطاله وتقبلوا تحيات اخوكم / غريب الاطوار ودمتم بخير

حـُـلم معجب بهذا

المصدر: منتديات أحاسيس الليل - من قسم: •₪• خوآطر وهوآجيس قلم •₪•

---

pwvdh frgld 🌷

طرحت ف ابدعت
بتلك القصه المميزه
شكري لك

أحسنتم الطرح
بآرك الله في جهودكم
ودمتم بهذا التوهج
الله يعطيكم الصحة العآفية

غايه الروعه
سلمت يمناك
الله يعطيك الف عافيه