قصيدة يا الحنون العود

قصيدة يا الحنون العود
يا لحون العود وإلا يا مجارير الربابه
إختلف معنى القصيد وضيع الفنان فنه
حلم مدري علم مدري نوض برق في سحابه
أثرها طلة جبينه يوم زاح الليل منه
أقبلت مثل الفرس لا سمعت طبول الحرابه
مقتفيها ليل أسود والنجوم يفرقنه
النهار يمر ويعدي وليله في عقابه
النحر صبح تجلى والجدايل كنهنه
مخمل يلتف فوق الجيد الأتلع بالنيابه
عن سلاسيل الذهب والماس خوف يجرحنه
غاب عني والوله خلاه عندي في غيابه
مادرى ان فرقاه نار ولا درى ان لاماه جنه
يا وجودي وجد من صفق على ماضي شبابه
بان شيبه والسنين اللي يبيهن خالفنه
غرته خضر السنين وراح عمره مادري به
غررنه وارفعنه لين سج وحولنه
ويا وجودي وجد عود لا عيال ولا قرابة
ما جداه إلا يون ويردف الونه بونه
مالقى فزعة رفيق ولا دعاة مستجابة
كل ما امسا له بظن خيبت الايام ظنه
هذا وجدي في غياب اللي نزح والله جابه
صح فرض الله فرض وسنة المرسول سنه
الغلا جسم رقيق ومرهف إحساسي ثيابه
مثل غصن الورد يوم الهبايب يطرقنه
ما زرعت إلا غلاه ولا نقلت إلا صوابه
والحشا ماضاق من خضر الطعون المستكنه
ياحبيبي مازها كف الخضاب إلا خضابه
فيه نظم المفردات وفيه للعشاق عنه
الظبي ماله شبيه وبينك وبينه تشابه
إلتفت بشويش وألقى فيه منك وفيك منه
خالقك من فضل محمد على كل الصحابة
وسخرك مثل المهار اللي تسخرها الأعنه
والثنا والشكر للي رحمته تسبق عذابه
لا لخلق الله شكر ولا لخلق الله منه
قاله اللي ما خذا مما يريد إلا هبابه
خيرة الفارس ثنية خيل صفرا مستعنه
مما راق لي

حـُـلم ,السامية ,غَيْم..! معجبون بهذا